25 наурызда газды дайындау және тасымалдау цехінің бірінші санатты инженері, еңбегі сіңген Екшембеев Асқар Халилұлын құрметпен зейнет демалысына шығарып салдық. Асқар Халилұлы мұнай-газ саласындағы жалпы еңбек өтілі 40 жылдан астам, оның ішінде 18 жылдан астам уақытын «Қазгермұнай» БК» ЖШС-де өткізді.

1989 жылы Екшембеев А. Х. Қазақстан политехникалық институтының Гурьев филиалын «Мұнай және газ ұңғымаларын бұрғылау» мамандығы бойынша бітірді. 2011 жылы Қ. Сәтпаев атындағы Қазақ ұлттық техникалық университетін бітіріп, мұнай-газ ісі бойынша бакалавр дәрежесін алды.

Еңбек жолын 1984 жылы Каспий маңы мұнай барлау экспедициясында бұрғылаушының көмекшісі болып бастаған. Әр жылдары «Тенгизнефть» МГӨБ-де ЦОС операторы, мұнай жабдықтарын жеткізу бойынша жетекші маман, жабдықтаушы болып жұмыс істеді.

«Қазгермұнай» БК» ЖШС-де 2008 жылдан бері еңбек етіп келеді. Жұмыс істеген жылдары ГДжТЦ 1 санатты инженері, Мұнай және газ өндіру департаментінің технологиялық қызметінің инженер-технологы, мұнай тасымалдау қызметінің басшысы лауазымдарын атқарды.

Компанияда жұмыс істеген жылдары: 2013 жылы «ҚазГерМұнай» компаниясының 20 жылдығына орай «Қазмұнайгаз» БӨ» АҚ Құрмет грамотасымен; 2019 жылы «Қазақстан мұнайына 120 жыл» мерейтойлық медалімен марапатталған.